תהילים פרק טו

א מִזְמ֗וֹר לְדָ֫וִ֥ד    יְ֭הוָה מִֽי־יָג֣וּר בְּאָֽהֳלֶ֑ךָ מִֽי־יִ֝שְׁכֹּ֗ן בְּהַ֣ר קָדְשֶֽׁךָ׃
ב הוֹלֵ֣ךְ תָּ֭מִים וּפֹעֵ֥ל צֶ֑דֶק    וְדֹבֵ֥ר אֱ֝מֶ֗ת בִּלְבָבֽוֹ׃
ג לֹֽא־רָגַ֨ל ׀ עַל־לְשֹׁנ֗וֹ לֹֽא־עָשָׂ֣ה לְרֵעֵ֣הוּ רָעָ֑ה    וְ֝חֶרְפָּ֗ה לֹֽא־נָשָׂ֥א עַל־קְרֹבֽוֹ׃
ד נִבְזֶ֤ה ׀ בְּֽעֵ֘ינָ֤יו נִמְאָ֗ס    וְאֶת־יִרְאֵ֣י יְהוָ֣ה יְכַבֵּ֑ד
נִשְׁבַּ֥ע לְ֝הָרַ֗ע    וְלֹ֣א יָמִֽר׃
ה כַּסְפּ֤וֹ ׀ לֹֽא־נָתַ֣ן בְּנֶשֶׁךְ֮    וְשֹׁ֥חַד עַל־נָקִ֗י לֹ֥א לָ֫קָ֥ח
עֹֽשֵׂה־אֵ֑לֶּה    לֹ֖א יִמּ֣וֹט לְעוֹלָֽם׃